ກອງປະຊຸມໄດ້ຈັດຂື້້ນໃນວັນທີ​ 18 ມັງກອນ 2024 ທີ່ສະຖາບັນການຢາ-ການແພດພື້ນເມືອງກອງທັບ, ກະຊວງປ້ອງກັນປະ ເທດ.  ໃນພິທີດັ່ງກ່າວໄດ້ຮັບກຽດເປັນປະທານຂອງ ພົວ ຄໍາແພງ ພູມມະແກ້ວ   ຫົວໜ້າກົມເສນາຮັກ ກົມໃຫຍ່ພາລາທິການກອງທັບ, ມີຫົວໜ້າກົມອາຫານ ແລະ ຢາ,  ຫົວໜ້າສະຖາບັນການຢາ-ການແພດພື້ນເມືອງກອງທັບ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ. ສູນວິໄຈອາຫານ ແລະ ຢາ ເຂົ້າຮ່ວມ 3 ທ່ານ ເຊິ່ງນໍາພາໂດຍ ດຣ. ບຸນສີ ສີບຸນເຮືອງ ຮອງຫົວໜ້າສູນວິໄຈອາຫານ ແລະ ຢາ. ກອງປະຊຸມຄັ້ງນີ້ຈັດຂື້ນເພື່ອພົບປະແລກປ່ຽນ ບົດຮຽນເຊິ່ງກັນ ແລະ ກັນໃນວຽກງານການຢາ-ການແພດພື້ນເມືອງ ແລະ ວຽກງານພັດທະນາການຈັດຫາ, ການຄຸ້ມຄອງການນໍາໃຊ້ຢາ ແລະ ຜະລິດຕະພັນການແພດອື່ນໆ. ພ້ອມນັ້ນທັງສອງຝ່າຍກໍ່ໄດ້ພັດປ່ຽນກັນສະເໜີພາລະບົດບາດຂອງຕົນ. 

ພາຍຫຼັງສໍາເລັດການ ແລກປ່ຽນບົດຮຽນເຊິ່ງກັນ ແລະ ກັນ ແລ້ວ ທ່ານ ດຣ. ບຸນຊູ ແກ້ວຫາວົງ ຫົວໜ້າກົມອາຫານ ແລະ ຢາ, ກະຊວງສາທາລະນະສຸກ ກໍ່ໄດ້ມີຄໍາເຫັນ ແລະ ອວຍພອນເນື່ອງໃນໂອກາດວັນສ້າງຕັ້ງກອງທັບຄົບຮອບ 75 ປີ  ພ້ອມທັງມອບກະຕ່າຂອງຂັວນ ແລະ ວັດຖຸປັດໃຈຈໍານວນໜຶ່ງ. ໂອກາດດັ່ງກ່າວກໍ່ໄດ້ລົງຢ້ຽມຢາມໂຄງການກໍ່ສ້າງໂຮງງານຢາ 104 ກອງທັບແຫ່ງໃໝ່ຢູ່ບ້ານຊຽງດາ ແລະໂຄງການສ້າງຕັ້ງບໍລິສັດ PSD ພັດທະນາເຕັກໂນໂລຊີການຢາ-ການເເພດຈໍາກັດອີກດ້ວຍ.