ໃນວັນທີ 18 ພະຈິກ 2023, ທ່ານ ຣູເບັນ ຣີມີຈີໂອ ເຟີໂຣ ປະທານສານປະຊາຊົນສູງສຸດແຫ່ງ ສາທາລະນະລັດກູບາ ພ້ອມດ້ວຍຄະນະ ໄດ້ເຂົ້າຢ້ຽມຢາມ ສູນວິໄຈອາຫານແລະຢາ, ໂດຍໃຫ້ການຕ້ອນຮັບຢ່າງອົບອຸ່ນຈາກ ທ່ານ ດຣ.​ ຈັັນສະພາ ປາມະນີວົງ ຫົວໜ້າສູນວິໄຈອາຫານແລະຢາ ພ້ອມດ້ວຍຄະນະນໍາຂອງສູນວິໄຈອາຫານແລະຢາ.

           ທ່ານ ດຣ. ຈັນສະພາ ປາມະນີວົງ ໄດ້ກ່າວຕ້ອນຮັບ ແລະ ສະແດງຄວາມຍິນດີ ຕໍ່ການມາຢ້ຽມຢາມຂອງ ທ່ານ ຣູເບັນ ຣີມີຈີໂອ ເຟີໂຣ ພ້ອມດ້ວຍຄະນະ ໃນຄັ້ງນີ້. ຈາກນັ້ນ ທ່ານ ປອ. ນ. ມະໄລທອນ ພະນາວັນ ຫົວໜ້າຂະແໜງບໍລິຫານ, ສູນວິໄຈອາຫານແລະຢາ ໄດ້ນໍາສະເໜີປະຫວັດຄວາມເປັນມາ ແລະ ການເຄື່ອນໄຫວວຽກງານຂອງສູນ ນັບຕັ້ງແຕ່ມື້ສ້າງຕັ້ງ ຈົນເຖິງປະຈຸບັນ, ໂດຍສະເພາະໄດ້ເນັ້ນໃຫ້ເຫັນເຖິງຄວາມສຳຄັນ ໃນການວິໄຈຢາເສບຕິດ - ວັດຖຸອອກລິດຕໍ່ຈິດ ແລະ ປະສາດ ເຊິ່ງເປັນຈຸດສໍາຄັນໃນການພົວພັນລະຫວ່າງສູນ ແລະ ສານປະຊາຊົນສູງສຸດແຫ່ງ ສປປ ລາວ, ນອກຈາກນັ້ນຍັງໄດ້ປຶກສາຫາລື, ຖອດຖອນບົດຮຽນ ລະຫວ່າງ 02 ປະເທດ. ໃນໂອກາດດັ່ງກ່າວ ທ່ານ ຣູເບັນ ຣີມີຈີໂອ ເຟີໂຣ ພ້ອມຄະນະ ຍັງໄດ້ເຂົ້າຢ້ຽມຊົມຫ້ອງວິໄຈຂອງສູນວິໄຈອາຫານແລະຢາ ເພື່ອເບີ່ງຄວາມພ້ອມ - ຄວາມສາມາດ ໃນການວິໄຈອາຫານ, ຢາ, ອຸປະກອນການແພດ, ຢາເສບຕິດ - ວັດຖຸອອກລິດຕໍ່ຈິດ ແລະ ປະສາດ ທີ່ສູນວິໄຈອາຫານແລະຢາ ສາມາດວິໄຈໄດ້.

ຂຽນຂ່າວໂດຍ: ນ. ຈັນທະມາລີ ທອງສະຫວັດ

ຮູບພາບຈາກ: ສານປະຊາຊົນສູງສຸດແຫ່ງ ສປປ ລາວ