ໃນວັນທີ 11 ສິງຫາ 2022 ທີ່ຫ້ອງປະຊຸມໃຫຍ່ຂອງສູນວິໄຈອາຫານ ແລະ ຢາ, ໜ່ວຍສະຫະພັນແມ່ຍິງຮາກຖານສູນວິໄຈອາຫານ ແລະ ຢາ ໄດ້ຈັດກອງປະຊຸມໃຫຍ່ຄັ້ງທີ VIII ຂຶ້ນຢ່າງເປັນທາງການ ໂດຍການເປັນປະທານຂອງທ່ານ ດຣ. ນ. ຜາສຸກ ວົງວິຈິດ, ຄະນະບໍລິຫານງານແມ່ຍິງສູນກາງສະຫະພັນແມ່ຍິງລາວ, ປະທານສະຫະພັນແມ່ຍິງກະຊວງສາທາລະນະສຸກ, ທ່ານ ດຣ. ຈັນສະພາ ປາມະນີວົງ ເລຂາໜ່ວຍພັກຮາກຖານສູນວິໄຈອາຫານ ແລະ ຢາ, ຫົວໜ້າສູນວິໄຈອາຫານ ແລະ ຢາ ແລະ ທ່ານ ດຣ. ນ. ແສງຈັນ ພົງສະຫວັດ, ປະທານໜ່ວຍສະຫະພັນແມ່ຍິງຮາກຖານສູນວິໄຈອາຫານ ແລະ ຢາ, ຮອງຫົວໜ້າຂະແໜງຮັບປະກັນຄຸນນະພາບ. ມີສະມາຊິກເຂົ້າຮ່ວມທັງໝົດ 33 ສະຫາຍ. ກອງປະຊຸມໄດ້ລາຍງານບົດລາຍງານການເມືອງ ແລະ ບົດສະຫຼຸບ 5 ປີ ຈາກທ່ານ ດຣ. ນ. ແສງຈັນ ພົງສະຫວັດ ປະທານສະຫະພັນແມ່ຍິງຂອງສູນ, ເຫັນວ່າ ສະໄໝທີ VII ຜ່ານມາແມ່ນສາມາດຊີ້ນໍາ, ນໍາພາໃນຫຼາຍໆດ້ານທີ່ພົ້ນເດັ່ນ ເຊິ່ງເຮັດໃຫ້ໜ່ວຍມີຜົນງານຢ່າງຫຼວງຫລາຍ ແລະ ນອກຈາກນັ້ນກອງປະຊຸມຍັງໄດ້ຄັດເລືອກເອົາຄະນະໜ່ວຍສະຫະພັນແມ່ຍິງຊຸດທີ VIII ຕື່ມ ໂດຍມີການສະເໜີລາຍຊື່ສະມາຊິກຜູ້ທີ່ມີຄວາມສາມາດ ແລະ ມາດຖານເງື່ອນໄຂຄົບຖ້ວນ 5 ສະຫາຍ ເຊິ່ງເລືອກໄດ້ 3 ສະຫາຍ ດັ່ງນີ້້:
1. ປອ. ດຣ. ນ. ມະໄລທອນ ພະນາວັນ ເປັນປະທານ.
2. ດຣ. ນ. ໄພວັນ ພິມມະສານ ເປັນຮອງປະທານ.
3. ນ. ຫົງຄຳ ຖິລະປຸນໂຍ ເປັນກຳມະການ.
ພາຍຫຼັງສຳເລັດກອງປະຊຸມຄັ້ງປະຖົມມະລຶກ ທ່ານປະທານໄດ້ໃຫ້ຄຳເຫັນ ແລະ ທິດຊີ້ນຳແກ່ຄະນະຊຸດໃໝ່ໃນຫຼາຍດ້ານ ເພື່ອເປັນທິດທາງໃນການຊີ້ນຳນຳພາໜ່ວຍຂອງຕົນໃຫ້ເຕີບໃຫຍ່ເຂັ້ມແຂງໜັກແໜ້ນ ແລະ ພັດທະນາຢ່າງບໍ່ຢຸດຢັ້ງ ມາຮອດເວລາ 16:00 ໂມງ ຂອງວັນດຽວກັນ ກອງປະຊຸມໄດ້ປິດລົງຢ່າງເປັນທາງການ.
| 