ວັນທີ 01 ພຶດສະພາ 2026, ທ່ານ ດຣ. ນ. ພັດສະລີ ອຸດົມສັກ ຄະນະກຳມະບານຮາກຖານ ສອຢ ພ້ອມດ້ວຍຕາງໜ້າສະມາຊິກກຳມະບານຮາກຖານ ສອຢ ຈຳນວນ 05 ທ່ານ ໄດ້ເຂົ້າຮ່ວມຂະບວນການຍ່າງເພື່ອສຸຂະພາບ ໃນພິທີຍ່າງເພື່ອສຸຂະພາບສະເຫຼີມສະຫຼອງວັນກຳມະກອນສາກົນ ຄົບຮອບ 140 ປີ (01 ພຶດສະພາ 1886 - 01 ພຶດສະພາ 2026) ພາຍໃຕ້ຄໍາຂວັນ: “ກຳມະບານລາວເຂັ້ມແຂງ, ທັນສະໄໝ, ສາມັກຄີ, ມີວິໄນ ແລະ ນໍ້າໃຈສາກົນກຳມະຊີບ” ພິທີດັ່ງກ່າວໄດ້ຈັດຂຶ້ນ ທີ່ ສວນປະຕູໄຊ, ນະຄອນຫລວງວຽງຈັນ ໂດຍມີ ທ່ານ ກິແກ້ວ ໄຂຄຳພິທູນ ປະທານສູນກາງແນວລາວສ້າງຊາດ, ທ່ານ ຄຳພັນ ເຜີຍຍະວົງ ຫົວໜ້າຄະນະໂຄສະນາອົບຮົມສູນກາງພັກ ພ້ອມດ້ວຍບັນດາທ່ານລັດຖະມົນຕີ, ຮອງລັດຖະມົນຕີ, ຄະນະກົມ, ຜູ້ຕາງໜ້າຈາກອົງການຈັດຕັ້ງສາກົນປະຈໍາລາວ, ພະນັກງານ-ລັດຖະກອນ, ສະມາຊິກກໍາມະບານ, ກໍາມະກອນ, ຊາວຜູ້ອອກແຮງງານ ທັງພາກລັດ ແລະ ເອກະຊົນ ເຂົ້າຮ່ວມຢ່າງພ້ອມພຽງ.

          ພາຍໃຕ້ບັນຍາກາດການສະເຫຼີມສະຫຼອງວັນກຳມະກອນສາກົນ,​ ໃນຕອນເຊົ້າຂອງວັນທີ 02 ພຶດສະພາ 2026, ກະຊວງສາທາລະນະສຸກ ໄດ້ເປີດຂະບວນການອອກແຮງງານລວມອ້ອມຂ້າງກະຊວງສາທາລະນະສຸກ, ໂດຍພາຍໃຕ້ການນຳພາຂອງ ທ່ານ ນ.​ ໃບຄໍາ ຂັດຕິຍະ ລັດຖະມົນຕີກະຊວງສາທາລະນະສຸກ ພ້ອມດ້ວຍ ບັນດາທ່ານຮອງລັດຖະມົນຕີ, ຄະນະກົມ, ຄະນະສູນ, ໂຮງໝໍສູນກາງ, ໂຮງຮຽນ, ສາມອົງການຈັດຕັ້ງມະຫາຊົນ ແລະ ພະນັກງານອ້ອມຂ້າງກະຊວງສາທາລະນະສຸກເຂົ້າຮ່ວມ. ຕາງໜ້າ ສອຢ ທ່ານ ດຣ. ລຳເພັດ ຂຸນສັກນະລາດ, ທ່ານ ດຣ.​ ບຸນສີ ສີບຸນເຮືອງ ຮອງຫົວໜ້າ ສອຢ ກໍ່ໄດ້ນຳພາ ພະນັກງານ ສອຢ 05 ທ່ານ ເຂົ້າຮ່ວມຂະບວນການອອກແຮງງານໃນຄັ້ງນີ້ດ້ວຍ.